Ата-Бейит тууралуу

«Ата-Бейит» – кыргыз элинин улуттук тарыхы жана эс тутумунун символу, эң маанилүү эскерүү жайларынын бири. Бишкектен 20 чакырым түштүктө, Чоң-Таш айылында жайгашкан бул ыйык комплексте 1938-жылдагы сталиндик репрессиянын курмандыктары – мамлекеттик жана коомдук ишмерлер, илим-билим менен маданияттын көрүнүктүү өкүлдөрү, анын ичинде улуу жазуучу Чыңгыз Айтматовдун атасы Төрөкул Айтматов да жерленген. Жалпысынан бул жерде 137 адамдын сөөгү коюлган. Ошондой эле 2010-жылдагы апрель революциясында жана июнь окуяларында курман болгондордун да сөөгү ушул жерде жай тапкан.

 

 

Комплекс 2 гектар аянтты ээлейт жана скульптуралык композиция менен музейден турат. Музейде 1920–30-жылдардагы Кыргызстандагы саясий кырдаал жөнүндө тарыхый документтер жана сүрөттөр, Чоң-Таштагы кыргындын курмандыктарына байланышкан материалдар сакталган. Мемориалдын борбордук элементи – кыргыз мамлекеттүүлүгүнүн символу болгон тундук, анын астында репрессиядан каза тапкандардын сөөгү коюлуп, ысымдары түбөлүккө ташка жазылып калган.

«Ата-Бейит» – бул кайгы менен эстөөнүн гана эмес, улуттук биримдик менен мамлекеттик өзүнчөлүктүн символу. Ал кыргыз элинин оор, бирок унутулбас тарыхын эскертип, жаңы муундарды адилеттүүлүккө жана ата-бабалардын эрдигин урматтоого чакырып турат.

 

 

Жаңы муун үчүн мааниси

Ата-Бейитке баруу жаш муун үчүн чоң тарбиялык мааниге ээ. Студенттер тарыхтын оор барактарын жүрөктөн сезип, ата-бабалардын эрдигин жана мекен үчүн курмандыгын даңазалашты. «Өткөндү урматтаган элдин келечеги жарык болот» дегендей, мындай иш-чаралар тарыхты унутпай, аны урпактарга жеткирүүнүн маанилүүлүгүн дагы бир жолу далилдеди.

Ыраазычылык жана таасир.

Саякат абдан таасирдүү жана позитивдүү маанайда өттү. Студенттер ыйык жайдын тынчтыгын, салмактуу маанисин сезип, мекенчилдикке болгон сезимдери күчөдү. КММАнын атынан 8-тайпанын куратору Раимкулов Курсанбек Мамасалиевичке чоң ыраазычылык билдиребиз, анткени ал мындай тарбиялык жана таанып-билүүчү иш-чараларды уюштуруп, студенттердин билим менен катар тарыхый аң-сезимин, мекенчилдик сезимин чыңдоого, руханий дүйнөсүн байытууга, тарыхка жана мекенге болгон сый-урматын арттырууда чоң салымын кошуп келет.